Vastelaovend 2022, oos activiteite op ein riej…

Vastelaovend geit altied door! En auch al kènne weer es vereiniging neet väöl organisere, ver wille toch gear oos Vastelaovesblood laote struime. De reagels van vandaag (5 februari) laote gein evenemente of optochte toe. Maer neet getreurd, d’r is ein bietje houp dat de Euverheid get meer ruimte geuf es vandaag mäögelik is.

#Steinkleurt; in de ganse gemeinte Stein eine wedstrijd veur ’t sjwoanste verseerde hoes. Hang slingers, balonnen en lempkes op. Laot zeen datse ein Vastelaoveshart höbs. De sjwoanst verseerde kènt eine leuke pries winnen!

#Vastelaovesposter 2022; teiken mit, kleur mit! de sjwoanste teiekening weurt door de prinsen gekaoze en zal in formaat A2 gedrökt weare. Dea is dan vanaaf dônderdig 24-2 aaf te haole bie Schitterend Bijouwelry in ’t Winkelcentrum van Stein.

#7×11+7 Tentoonstelling; de geschiedenis van de Steinder Bök is in de foyer van MFC de Grous te bekieke tot en met Haufvasten (neet mit de vastelaovesdaag zelf). Kôm kieke nao oos verleden!

#Bokke-TV; neave de filmkes op de Bokke-TV pagina van deze site, höbbe ver vriedig 25-2 Bokke-TV Live! Eine live-stream mit alle klassen van de drie Basissjwoale. Vanoet de Grous zende ver ein minizitting oet, die in alle klassen te volgen is. In diverse groepen zullen kènjer optreaje; dat is dan weer in de anger klassen live te volgen. 

#Kènjerkwistoch; vanaaf 20-2 steit eine leuke kwistoch online; geweun downloade, oetprinte en wenjele mit hie en dao eine tösjestop bie Lies, Tilly, Christel, Ricky, Joyce en Danny of Miranda en John. Deze is te loupe tot en met Esjwoonsdig. Väöl plezeer mit wenjele en kwissen!

#Sleuteleuverdrach; op Dônderdig 24-2 kènt ger via Social Media en Bie Os lokale omroep de sleuteleuverdrach volgen vanoet ’t Gemeintehoes. Alle vereinigingen oet Stein zulle dao afgevaardigd zeen.