Oud-Prins Jos II Diederen euverleeje

Dit versjrikkelijk nuuts is aafgeloupe weekend bie de Societé Oud Prinsen (’t SOP) en Vastelaoves Vereiniging de Steinder Bök bènne gekôme. Oud-Prins Jos waor in 1994 prins van de Steinder Bök.

Jos waor in Stein bekènd van zien danssjwoal aan de Haven in Stein. És oud-prins waor hea eine van de initiatiefnummers veur eine doorstart van de vereiniging nao ein aantal moeilijke jaore. ’t Bokkeweekend heat zien oorsprong in zien danssjwoal, wo ver és Steinder Bök dankbaar gebruuk höbbe gemaak van zien locatie. Jaorelang höbbe ver meinige prins dao maoge oetrope en sjieke recepties kènne belaeve.

Jos waor eine sjieke prins, mit zien Kölsch pak en trôk euveral de aandach mit zien rwoaj sjoon, veurzeen van witte strikke en zien vaste begeleiders; de leden van de danssjwoal die és “De Sjwiksjrömers” door de Steinder Vastelaovend trokke.

Oos gedachte gaon oet nao zien familie en vrunj.

Jos, eine lètste Alaaf veur dich!

Societé Oud Prinsen ’t Sop

VAstelaoves Vereiniging de Steinder Bök

Ere Raodslid Raymond Cremers euverleeje.

Nao maonden van veurbereidingen en eine geslaagde aovend, wobie oos nuuje Hooglustigheden officieel zeen veurgestèld aan de Wieze Raod, kaom ein versjrikkelijk berich bènne. Oos lid van de Ere-Raod, Raymond Cremers is plotseling euverleeje. Dat nuuts kaom es eine donderslaag bie heldere hemel. Hea is vanaaf begin van het jaor lid van oos vereiniging. Raymond, voetbalfan, reagelneaf, organisator in hart en neere, vereinigingsman van zien haore tot zien veut is neet meer. Donderdigaovend same aan ein pilske, en noe dan dit berich. ’t Is ôngeluifelijk en door nemes te bevatten.

In euverlègk mit zien gezin Wendy en Mike is beslaote oos geplande festiviteiten van vandaag “geweun” te laote doorgaon. Raymond kènnende; “ver mote d’r waal staon!” héj hea dit auch neet anders gewild. Veur ’t insjeete van ’t sezoen vanmiddig, zulle veer ein minuut stilte in acht numme. Ver houpe op uch begrip hieveur.

Ver wunsje Wendy en Mike heel väol sterkte mit dit zwaore verlees.

Namens Bestuur en leden VV de Steinder Bök,

Ton Sleijpen

Lèt op! Aanpassing route Grwoate Optoch 2023!

Euver oze Optochroute is dit jaor väöl te doon. ’t Is echter neet zwoa eenvoudig aanpassingen te doon, vanwege allerlei versjillende aafwaeginge die weer és Steinder Bök wille en môte maake. Simpel en Ad Hoc aanpassingen in de route maken is d’r neet bie. Weer höbbe in good euverlègk mit de Gemeinte Stein al jaore ein route opgestèld wobie de volgende punten van belang zeen;

  • veiligheid van kiekers en deilnummers
  • optimale doorstruiming van verkjaer
  • zoväöl mäögelik straote opnumme ôm alle meujte en tied wat deilnummers in d’n optoch staeke aan de luuj te kènne laote zeen

De horeca speelt hiebie auch ein belangrieke rol ôm versjillende reije; zie make de optochte mit hunne steun mäögelik en op die plaatse staon väöl kiekers.

Dit jaor höbbe ver echter geconstateerd dat de Gemeinte Stein verkeersremmende maotraegele heat genôme bie de kruusing Vaart – Heerstraot. Daodoor is ’t neet meer mäögelik ôm vanoet de Vaart de Heerstraot in te drejje. In good euverlègk is aafgespraoke d’n Optoch bie de Vaart te laote euverstaeke nao de Langhaagwaeg, en vervolgens via de Breinderwaeg weer de Smeetsstraot in te drejje. Zwoa hauwe ver d’n optoch veilig.

Alvas dank veur uch begrip. Vastelaovend same!